ٹیمپا، فلوریڈا— امریکی سینٹرل کمانڈ (سینٹ کام) اور علاقائی شراکت داروں نے 12 جنوری کو قطر کے العدید ایئر بیس میں ایک نیا کوآرڈی نیشن سیل قائم کیا، جس کا مقصد مربوط فضائی اور میزائل دفاع کو مضبوط بنانا ہے۔ 

نیا مشرقِ وسطیٰ ایئر ڈیفنس–کمبائنڈ ڈیفنس آپریشنز سیل (MEAD‑CDOC) مشترکہ فضائی آپریشنز سینٹر (CAOC) میں واقع ہے اور اس میں امریکہ اور علاقائی شراکت داروں کے اہلکار شامل ہیں۔ 

قطر میں قائم مشترکہ فضائی آپریشنز سینٹر، جو 20 سال سے زائد عرصہ قبل قائم کیا گیا تھا، اس وقت 17 ممالک کے نمائندوں پر مشتمل ہے جو پورے مشرقِ وسطیٰ میں فوجی فضائی اثاثوں کے استعمال کی ہم آہنگی کرتے ہیں۔ CAOC کے اندر قائم نیا MEAD‑CDOC علاقائی شراکت داروں کے درمیان فضائی اور میزائل دفاع کے لیے تعاون اور انضمام کو مزید بہتر بنانے کے لیے تیار کیا گیا ہے۔ 

سینٹ کام کے کمانڈر ایڈمرل بریڈ کوپر نے کہا: ”یہ علاقائی دفاعی تعاون کو مضبوط بنانے کی جانب ایک اہم پیش رفت ہے، اور یہ سیل اس امر کو مزید مؤثر بنائے گا کہ علاقائی افواج مشرقِ وسطیٰ میں فضائی اور میزائل دفاع کی ذمہ داریوں کو کس طرح ہم آہنگ کر کے ایک دوسرے کے ساتھ شیئر کرتی ہیں۔“ 

امریکی ایئر فورس سینٹرل (AFCENT) کے اہلکار MEAD‑CDOC میں اپنے علاقائی ہم منصبوں کے ساتھ مل کرکثیرالقومی مشقوں کی منصوبہ بندی، ڈرلز کی انجام دہی اور ہنگامی حالات کا جواب دینے پر کام کریں گے۔  

یہ سیل معلومات کے تبادلے اور خطرات سے متعلق وارننگز جاری کرنے کی ذمہ داری بھی سنبھالے گا۔ 

ایئر فورس سینٹرل کے کمانڈر لیفٹیننٹ جنرل ڈیریک فرانس نے کہا: ” MEAD‑CDOC ایک مستقل پلیٹ فارم فراہم کرتا ہے جہاں مہارت کا تبادلہ کیا جا سکتا ہے اور علاقائی شراکت داروں کے ساتھ مل کر مشترکہ طور پر نئے حل تیار کیے جا سکتے ہیں۔ یہ پورے خطے میں ہمارے مربوط فضائی اور میزائل دفاع کو مزید مضبوط بناتا ہے۔“ 

مشرقِ وسطیٰ ایئر ڈیفنس–کمبائنڈ ڈیفنس آپریشنز سیل کا افتتاح گزشتہ سال امریکی آرمی سینٹرل کی جانب سے قطر اور بحرین کے ساتھ فضائی اور میزائل دفاع کے لیے دو دوطرفہ کمبائنڈ کمانڈ پوسٹس کے قیام کے بعد عمل میں آیا، اور یہ نئی سہولیات مربوط فضائی دفاع کی منصوبہ بندی، ہم آہنگی اور آپریشنز کے لیے کلیدی مراکز کے طور پر کام کرتی ہیں۔