ٹیمپا، فلوریڈا—امریکی سینٹرل کمانڈ نے 21 جنوری کو شمال مشرقی شام سے داعش قیدیوں کی عراق منتقلی کے مشن کا آغاز کیا، تاکہ یہ یقینی بنایا جا سکے کہ دہشت گرد محفوظ حراستی مراکز میں رہیں۔

مشن کے آغاز پر، امریکی افواج نے الحسکہ، شام کے ایک حراستی کیمپ میں رکھے گئے 150 داعش جنگجوؤں کو کامیابی سے عراق میں ایک محفوظ مقام پر منتقل کیا۔

مجموعی طور پر، تقریباً 7000 داعش قیدیوں کو شام سے عراق کے زیرِ انتظام مراکز میں منتقل کیا جا سکتا ہے۔

سینٹ کام کے سربراہ ایڈمرل بریڈ کوپر نے کہا: "ہم علاقائی شراکت داروں، بشمول عراقی حکومت، کے ساتھ قریبی رابطے میں ہیں اور داعش کی مستقل شکست کو یقینی بنانے میں ان کے کردار کی قدر کرتے ہیں۔ داعش قیدیوں کی منظم اور محفوظ منتقلی کسی بھی ممکنہ فرار کی روک تھام کے لیے نہایت اہم ہے، جو امریکہ اور علاقائی سلامتی کے لیے براہِ راست خطرہ بن سکتا ہے۔"

واضح رہے کہ 2025 میں امریکہ اور اس کے اتحادیوں نے شام میں 300 سے زائد داعش کارندوں کو گرفتار کیا اور اسی عرصے میں 20 سے زیادہ کو ہلاک کیا ہے۔